هوبا و رجعنا للتدوين!

بسم الله الرحمن الرحيم
ما أعرف أقول مرحبًا ..
أو أقول الحمدلله على السلامة رجعت أخيرًا للتدوين
أحس بغرابة كأني في حلم لكن شعور رائع جدًا
شعور الكتابة بدون توقف ولا قيود

آخر مرة دونت كانت عام 2011 يعني قبل 6 سنوات بالضبط
مدونتي السابقة مازالت موجودة لكن ضيعت الباسوورد
و بيني وبينكم حلوة دايم البدايات الجديدة 😂

التدوين موجود من زمان و أهني اللي مستمرين في هذا المجال وما زالوا ينعشونه
لأن مهما طلعت مواقع تواصل اجتماعي أغلبها لحظي ويروح كل شيء فيها
ما يبقى محتوى مرتب ومحفوظ كثر المدونات مهما اختلفت المواصفات

هل التدوين محصور على ناس معينة؟ أو حتى لازم أكون بمواصفات خاصة عشان أدون؟

طبعًا لا .. هذي مساحة شخصية بالنهاية و كل مافيها تجارب بسيطة بس حبيت أوثقها

بعد بوست "23 شيء تعلمته في عمر الـ23"
تحمست أرجع احتفظ بالحكي في مكان آمن .. 
ودعائي الخالص إنه ما تكون بس شرارة حماس وتنطفي!

لما قررت أرجع للتدوين حطيت كذا ملاحظة قدام عيوني عشان ما تتوقف الحماسة هذي

الملاحظات هي:

1- أكتب بأي لهجة كانت ، لا تدقيق نحوي مطلوب ولا لغة فصحى.
2- استرسل بالكتابة لأن كثرة التردد بتطفشني بالنهاية.
3- الزبرقة الواجدة والتكلف بالإخراج ممنووووعة.
4- ما أحصر نفسي على مجال واحد ، اللي بيجي بخاطري اكتب عنه.

ليه قررت أرجع للتدوين؟

1- زي ما قلت لكم مكان آمن للاحتفاظ بأفكاري.
2- مشاركتها مع ناس حلوة مثلكم.
3- اشغل فراغي بشيء مفيد.
4- أزيد من حصيلتي اللغوية و يمكن يهديني ربي واتعلم اختصر كلامي.
5- أوسع نظرتي للأمور و أتابع نفسي أول بأول.


وبس والله!