تجربتي مع الأندية الطلابية في الجامعة

بسم الله الرحمن الرحيم..

هذا أكثر موضوع كان محمسني أفتح المدونة وأكثر موضوع كتبت ومسحت فيه كثير

لأني ما أدري من وين أبدا ، أحس كل شيء فيه مهم..

حاولت أجمع أغلب الاستفسارات اللي جتني عن الجو العام للأندية في هالبوست وأتمنى يكون مفيد.

لذلك اللي مستعجل ما ينفع له البوست هذا أبدًا ، جيبوا لكم كوب شاي وروقوا عليه.

طبعًا أنا كنت في جامعة الملك سعود لذلك كلامي كله يختصر تجربتي هناك ، ولا عندي خلفية عن بقية الجامعات..

واللي راح أتكلم عنه التفاعل و التسجيل مع الأندية فقط ..

بالنسبة للاستفادة منها بدون التسجيل فيها والدورات راح أطرحه بوقت ثاني.

_________

نبذة تعريفية:

* ما هي الأندية الطلابية؟

هي مراكز خارج النطاق الدراسي ، هدفها غالبًا ثقافي تعليمي ترفيهي و يهدف إلى تطوير مهارات الطالب و صقل شخصيته إضافة إلى تعزيز روح التعاون و المبادرة لديه.

لمعرفة المزيد عن الأندية الطلابية في جامعة الملك سعود و أهدافها: من هنا

* ايش فائدة النوادي؟

- تنقلك لجو خارج الدراسة تمامًا ، تزيد من انتمائك للجامعة و تقضي لك وقت فراغك فيها.
- تنمي مهارات كثيرة عندك: القيادة ، المعرفة ، إدارة المخاطر ، التخطيط والتنفيذ ، إدارة الوقت ، تقسيم المهام وغيرها...
- تصقل شخصيتك و تزيد من ثقتك بنفسك.
- تنمي روح التعاون وتقبل الآراء و التفاعل مع المجتمع.
- تكسر حاجز الخجل و تزيد من جانبك الاجتماعي.
- تفتح لك فرص كبيرة مع جهات خارجية.

* لها شهادات؟ وايش يعني ساعات نشاط؟ فيها درجات؟

نعم فيه شهادة تثبت شغلك في النادي سواء لفعالية معينة كنتي جزء منها أو تنظيم أو لجنة طوال الترم.
ساعات النشاط هي ساعات عملك للنادي في الدوام و في البيت ، ويتم احتسابها بالدقيقة و ترسل للشخص المسؤول أسبوعيًا حسب سياسة النادي اللي مسجلة معهم.
و تصدر لك فيها شهادة نهاية الترم بإجمالي عدد ساعاتك.
طبعًا لا ما تدخل بالمعدل ولا لها درجات ، لكن بعض الاستاذات يخلون جزء من درجات المشروع ساعات نشاط أو عمل تطوعي ويكون عليه درجات.

* هل فيه مكافأة على الشغل؟

مكافأتك هي تطوير نفسك و ساعات تثبت شغلك.
لكن فيه جهات في الجامعة تقدم مكافآت للطلاب حسب ساعات عملهم مثل التشغيل الطلابي.

* متى وقت التسجيل؟ اشتراك فصلي أو سنوي؟ وهل العضوية إلزامي استمر فيها؟

التسجيل يفتح في بداية الترم فقط ، وكل ما كان النادي تخصصي و نشيط كل ما كان أسرع يكتفي ويتقفل تسجيله.
طبعًا الأندية تختلف بعضهم قبول مباشر ، بعضهم تصفيه ثم مقابلات ، والبعض قبول ثم تصفيه من أول فعالية حسب تفاعلك وإنجازك معهم.
الاشتراك يكون فصلي وطبعًا مجاني ، وفي حال تستمرين معهم يعتمد على سياسة النادي إذا تسجلين من جديد او وجودك معهم يعني تجديد بحد ذاته.
العضوية غير ملزمة تستمرين فيها ممكن بأي لحظة تعتذرين وتطلعين من النادي ، لكن برضو يعتمد على سياسة النادي إذا يرجعك ترم آخر أو يوقف عنك التسجيل ترم آخر مثلًا و غيره..

* من الرئيس على النادي؟

الرئيسة على النادي تكون طالبة لها خبرة سابقة فيه ، وفي بعض الحالات يكون الرئيس أستاذة أو دكتوره.
طبعًا الطالبة فقط تدير النادي و تسوي الخطة و تنفذها و مسؤولة عن ساعات البنات و التنفيذ كامل ، لكن فوقها مشرفة أستاذة أكاديمية و مشرفة موظفة ترجع لهم في التصاريح أو القرارات الإدارية وما إلى ذلك.

* هل تقتصر فقط على الأشخاص الاجتماعيين؟

أنا اعتبر أنها أكبر فرصة للغير اجتماعيين يسجلون فيها ، وعن تجربة أعرف مجموعة بنات تغيرت شخصيتهم من هذي الناحية 180 درجة بعد الأندية و صاروا منفتحين أكثر ، واللي جريء برضو تزيده جرأة و تكتسبين منها مهارات التعامل مع مختلف الشخصيات .. الذكي اللي يستغلها صح و يخليها تطوير بصالحه.

* الفعاليات بداخل الجامعة أو خارجها؟

تعتمد على خطة النادي ، فيه فعاليات بنفس الكلية و فعاليات على مستوى الجامعة و فعاليات مشتركة مع قسم الرجال و فعاليات خارج الجامعة أو رحلات.

* ايش الفرق بين العضوة و المتطوعة؟

العضوة تكون جزء رئيسي من النادي وتتبع لجنة معينة ، عندها مسؤولية إضافية بجانب تنظيم الفعاليات .. مثلًا مسؤولية ميزانية أو علاقات عامة أو تصميم أو دعم لوجستي وغيره.
المتطوعة تكون فقط منظمة للفعاليات ولا عليها مسؤوليات أخرى تستلزم منها تسلمها أو تنفذها إلا في حال رغبت بالدخول لتجهيز فعالية.

وطبعًا يفرق في الساعات ، العضوة ساعاتها ساعات نشاط ، و المتطوعة ساعات تطوعية.

* كيف أعرف اي لجنة أنضم لها؟ و أوقات العمل؟

يعتمد على نوع النادي اللي راح تسجلين فيه ، في البداية سجلي في ميولك والمهارة اللي تمتلكينها
بعد ماتدخلين في الجو بتكتشفين جوانب ثانية وتبدين تبدلين بين اللجان أو تترقين مثلا متطوعه > عضوة > مشرفة > نائبة > مديرة.
بالنسبة لإدارة الوقت والالتزام به غالبًا يكون فيه اجتماعات شهرية أو مثلًا حسب الفعالية اللي دخلتيها ، يعني الشغل يكون غالبًا وقت الفعالية قبلها مثلا بشهر أسبوعين كذا ، وإذا تنظيم فهو نفس يوم الفعالية ، وإذا عضوية حسب وقت فراغك. ممكن وقت العمل يكون في دوامك أو خارج الدوام في البيت مثلًا.
ما أقدر أحدد لأنه يعتمد على سياسة النادي و نوع المهمة المستلمة.

* أسجل في أي نادي؟ لازم نفس تخصصي؟

سجلي في النادي اللي يبسطك ونفس ميولك حتى لو في كلية ثانية .. دام النادي راح يطور من مهاراتك ويصقلها أبدًا لا تفوتين الفرصة ، طبعًا نادي تخصصك مهم يعني ممكن تكونين فيه كعضوة رئيسية أو جانبي لأنه يعطيك فرص رحلات أو مقاعد ورش عمل أو دورات تخص تخصصك وتكون لك الأولوية طبعًا ويدعم السيرة الذاتية.
برضو التنويع حلو..

* كيف تفيد في السيرة الذاتية؟

اللي يدخل الجامعة ويطلع منها وبس السيرة الذاتية فيها معدله ما استفاد من الجامعة 70%
خاصة مهارات العمل مختلفة جدًا عن المهارات الأكاديمية مثل (بحث - استنتاج - حفظ...الخ)
لما يشوفون إن عندك اطلاع على معلومات في تخصصك أو تخصص مشابه أو حتى عام ودورات ومشاركات فعالة ، وبرضو لما يشوفون إن عندك مشاركات تطوعية تدل على روح لتعاون عندك وإنجاح الفريق كلها تعزز من السيرة الذاتية جدًا.
وأقولها لكم لا تفكرون بهالشيء في آخر ترم بالجامعة و معد تعرفين تاخذين ايش وتخلين ايش
وفعليًا ما تتكون عندك خبرات وبيبين إنك بس تعبين السيرة من تواريخ انشطتك !
وكل دفعة ماشاء الله تصير انشط من اللي بعدها ووقت التوظيف راح يكونون منافسينك خريجين حديثُا مثلك لكن وقت الدراسة عندهم أنشطة و ممكن كان عندهم عمل جزئي بعد ، المنافسة كل سنه تكون أقوى من اللي قبلها..
وعشان توصل الشيء لازم تثبت نفسك فيه..
بالنسبة لي أعتبر الأنشطة الطلابية هي واسطة اللي ماعنده واسطة..
لأن من خلالها تتوسع علاقاتك و صلتك بالناس المهمة غير إنها تدعم ملفك الشخصي كثيررررر، ولا تدرون مين ممكن تشتغلون معه شخصية مهمة أو بتكون مهمة بيوم وتفيدكم.
وشخصيًا أغلب الشركات اللي تتصل لعرض وظيفة يكون من أهم الأسباب الأنشطة اللي في السيرة الذاتية و تميزني عن البنات اللي معدلاتهم تبارك الله مرتفعة جدًا مع أنهم أشطر مني بمراحل لكن يفضلون الخبرة والإطلاع.

* ايش هو السجل المهاري؟ هل استفدتي منه؟

هو وثيقة رسمية معتمدة من الجامعة تصدرها وحدة السجل المهاري بمركز تنمية المهارات الطلابية (التابع لوكالة عمادة شؤون الطلاب لشؤون الطالبات) تشتمل على كافة الدورات التدريبية التي حصلت عليها الطالبة فترة دراستها الجامعية و ذلك لإثبات قدراتها و مهاراتها في المجالات غير الأكاديمية مما يدعم فرص منافستها على الوظائف.

يكون مقسم ساعات نشاط و ساعات تطوع إجماليها ثم تفصيل ، دورات عامة ودورات تخصصية مع جوائز الجامعة لك.
وبالنهاية يكون مختوم ، يعني زبدته يجمع لك كل شهاداتك بورقة وحدة مثبته من الجامعة وهذا شيء مره كويس.
(من هنا معلومات أكثر)

الصدق أكثر شيء تمشكلت فيه أيام الجامعة هو السجل المهاري والحين متحسفة على الوقت اللي ضيعته رايحة جايه عليهم ، بس أعتقد إنه في كل سنه راح تزيد أهميته عن اللي بعدها عشان كذا حرصت أوثق فيه شهاداتي لي وللزمن 😏
أهم شيء توثيق الشهادة أول بأول لأن شروطهم مرات دقيقة فتضطرين تطلبين تعديل للشهادة من الجهة المصدرة.
ما فيه أي مقابلة رحت لها وطلبوا مني يشوفون السجل المهاري ، بس كانوا يسألوني عن الدورات ايش استفدت منها أو كانت تتكلم عن ايش برضو وقتها وممكن مين قدمها وما إلى ذلك..
فمن كلامك معهم يعرفون أنت صادقة فيها أو تكذبين ، ومنها بيطلبون اثبات أو لا.

* نصيحة لآخر سنة في الجامعة؟

إذا عندك من قبل أنشطة مسجلة في السيرة الذاتية اجلسي عليها و صفيها ، شوفي ايش المهارات اللي ناقصتك و ايش الدورات اللي محتاجتها وراح تساعدك في تعزيز السيرة للتدريب و الوظيفة. عشان ما تضيعين وقتك بنفس مكانك أو تبذلين جهدك في شيء ما يثري سيرتك الذاتية بشي.
وإذا فاتك الفوت وتو تستوعبين الأنشطة 😂 معليش it's never too late ، ركزي على الأساسيات ..
 المهارات و دورات التخصص ودورات مهارات عامة.

* الأندية اللي شاركتي فيها و ايش كانت مشاركاتك؟

(الجزء هذا ما أقصد فيه استعراض بمشاركاتي و مقصدي منه إلهام شخص وتشجيعه على المشاركة ..
لو تطلون جوا نفسكم شوي بتكتشفون أشياء ما توقعتوا ان عندكم فيها مهارة وقدرة!)

في السنة التحضيرية: 
شاركت في ثلاث أندية ، بس كنت ضايعة ولا أعرف ايش الأندية لكن من باب شغل وقت الفراغ:
- نادي الفنون : شاركت في معرض فكرة الثاني و فازت رسمتي بالمركز الأول في فرع الفن الرقمي.
- نادي الأعمال: بديت معاهم على أساس بأشتغل على مشروعي بس للأسف ماكنت أعرف الطبخه وطلعت.
- نادي الروبتكس: سوينا أنا وصاحبتي روبوت يمشي بس قدام وورا وأسبوعين وطلعنا منه 😂

في جامعة الملك سعود - الدرعية:
- الأندية العامة على مستوى الجامعة: جربت ادخل معهم بس ماكان الشغل مريح بالنسبة لي بسبب أن عددهم كبير و أوقاتهم كانت غير مناسبة لجدولي بسبب اختلاف الكليات فكلهم شاركت مجرد مشاركات تطوعية وتنظيمية معهم فقط.

- الشراكة الطلابية:
اشتغلت معهم سنتين تقريبًا ، في كل ترم شاركت بفعالية بأني أكون جزء من تنفيذها. وجميعها "على مستوى الجامعة"

• Art week أسبوع الفن - فريق الإنتاج (رسالة الجامعة | هنا | هنا )
• مبادرة نصنع جيل2 - مدربة و مسؤولة ركن (رسالة الجامعة | هنا طالباتي | الكورنر | شبابيك | صحيفة الحياة )
• مبادرة مشروعي موهبتي - مشروع تجاري مشارك ومتحدثة (هنا | هنا | الكورنر)
• ونظمت معاهم كم فعالية بس شيء بسيط مره أول مابديت معهم.

- نادي المحاسبة (نادي تخصصي):
بدايتي معهم نظمت دورات كثير وفعاليات ، وبنفس الترم مسكت فعالية وكانت أول مره لي تعلمت منها كثير!

• فعالية أسبوع المحاسبة - قائدة (رسالة الجامعة | هنا)
• فعالية قدوة محاسبية - قائدة (المتاهة | الكورنرز )
• عضوة في لجنة التصاميم

- النادي الثقافي والاجتماعي لكلية إدارة الأعمال:
من أجمل مراحل الجامعة اللي مرت علي ، حب كبير أبدي 💘!
آخر سنة لي في الجامعة كانت قيادية بحت وتعلمت فيها دبل السنوات اللي قبل كلها وعرفت فيها ناس أحسن بعد :(

• الترم الأول - نائبة مديرة النادي (أنشطة الفصل الأول)
• فعالية فاتبعوني - قائدة ( 1 | 2 | 3 | 4 | 5 | 6 | المحتوى للفائدة )
• الترم الثاني - مديرة أحلى نادي في كليتنا 😍😂 (أنشطة الفصل الثاني | احصائية | العضوات )
• معرض قهوة وفن "على مستوى الجامعة" - قائدة (رسالة الجامعة | تقرير | 1 | 2 | 3 )

- بعد التخرج:
في الفترة اللي أبحث فيها عن عمل ، استمريت أتطوع مع الجامعة لأني ما أبي انسى المهارات وأشغل وقتي بعد.

• الترم الثاني 2017 - مستشارة للنادي الثقافي والاجتماعي (أنشطة الفصل الثاني)
• مجلة كلية إدارة الأعمال "العدد الأول" - مصممة (هنا المجلة)

* ايش أضافت الأنشطة الطلابية لبسمه؟

كل الفوائد اللي قلتها ببداية التدوينة نتيجة انعكاس لاحظته علي وعلى شخصيتي ، بسمه اللي دخلت الجامعة مب نفس بسمه اللي طلعت منها الحمدلله .. صح حتى بأيام المدرسة كنت نشيطة وأحب هالمجال
بس ما أنكر أبدًا إن أحسن شيء طلعت فيه من الجامعة هو الأندية..
لها دور كبير في صقل الشخصيه واكتساب المهارات، حتى العوائق فيها اعتبرها نقطة ايجابية تزيد من طاقة التحمل لدى الشخص.حتى من ناحية العلاقات تعرفت على ناس كثيرة من الناس الحلوة اللي صاروا قريبين مني إلى الناس اللي تبادلت معهم مصالح إلى الناس اللي اكتسبت منها الخبرة إلى الناس المهمة اللي فتحت لي فرص كثيرة !
"وسّع دائرة علاقاتك لا تنحصر بناس نفس اهتماماتك"الأنشطة الطلابية كنز في يد الطالب يستغله لصالحه دامه واصل لين عندك بدون جهد وبدون مال ، بس أعطيه وقت.


" وإن تعبت في عمل الخير ، فإن التعب يزول والخير يبقى ".أهم شي طلعت فيه إن العمل التطوعي فيه بركة عظيمة لما تقدم شيء بدون مقابل و تنصدم كيف يرجع لك بيوم من أحد أو بتيسير أمر .. وحرصت حتى بعد الجامعة استمر سواء بنشر علم أو فائدة قد ما أقدر
اللي بيذوق طعم مكافأتها بيعرف ايش أقصد..
اليوم اللي أتطوع فيه ألاحظ أنه تنفرج لي شغلات كثيره متعكره بيومي و تتيسر لي فرص ما كنت اتوقع حصولها في المدى القريب، ومع ان نهاية اليوم تكون متعبة جدًا إلا ان تعبها و تعب الوقت اللي قبلها بالتجهيز ينمحي اذا شفت الفيدباك و الناس استفادوا بسببك.
وما اكتشفت أني أتطوع بالمعنى الحقيقي للكلمه لحد ما صارت الساعات ما تهمني حسبتها للجامعه قد ما يهم انهم ما ضاعوا في يومي بشي سخيف.
وبأعيدها ثانية ، آخر سنة أضافت لي الكثير وكله بفضل الله ثم اللي حواليني..
بنهاية السنة تحقق إنجاز كنا نخطط له من بدايتها أنا وصديقتي شيماء والحمدلله تم (3 جوائز على مستوى الجامعة)
لذلك صدقوني مافيه شيء بيضيع على الفاضي ، كل جهد وإلا ما يرجع لك بأي شكل من الأشكال.

_________________

إلى هنا وصلنا للختام

أي استفسار / تعليق / نقد الكومنت هنا مفتوح أو هنا في صراحة

التدوينة أخذت مني يومين عشان أخلصها .. وحاولت أغطي أغلب الأشياء

تشجيعكم أحبه مره ويحمسني أعطي من كل قلب وأتمنى يوصل لقلوبكم بعد على طول 💖

أخيرًا تذكروا دائمًا :

Do what makes you happy. Life is too short to do something you don't love.

وبس والله..